ຢາດີແກ້ບາບ

ຄວາມລອດພົ້ນ ຄວາມບາບແລະການຖິ້ມໃຈເກົ່າເອົາໃຈໃໝ່ ແມ່ນໃຜຖືກຮ້ອງໃຫ້ຖິ້ມໃຈເກົ່າເອົາໃຈໃໝ່? “ເຮົາບໍ່ໄດ້ມາເພື່ອຈະເອີ້ນຄົນສິນທັມ ແຕ່ມາເອີ້ນເອົາຄົນນອກສິນທັມໃຫ້ຖິ້ມໃຈເກົ່າເອົາໃຈໃຫມ່” (ລູກາ 5:32) ແມ່ນຫຍັງທີ່ມາພ້ອມກັບການຖິ້ມໃຈເກົ່າເອົາໃຈໃໝ່? “ແລະຈະຕ້ອງປະກາດທົ່ວທຸກປະເທດໃນພຣະນາມຂອງພຣະອົງໃຫ້ຖິ້ມໃຈເກົ່າເອົາໃຈໃຫມ່ຮັບການຍົກບາບໂທດ ຕັ້ງແຕ່ກຸງເຢຣູຊາເລັມໄປ” (ລູກາ 24:47) ເຮົາຮູ້ຈັກຄວາມບາບໄດ້ແນວໃດ? “ພຣະບັນຍັດໄດ້ເຮັດໃຫ້ສັງເກດຮູ້ຈັກຄວາມບາບ” (ໂຣມ 3:20) ແມ່ນໃຜແນ່ເປັນຄົນບາບ? “ດ້ວຍວ່າເຮົາໄດ້ຟ້ອງແລ້ວວ່າ ທັງຄົນຢິວແລະຄົນຕ່າງຊາດກໍຢູ່ໃຕ້ອຳນາດຂອງຄວາມຜິດບາບທຸກຄົນ” (ໂຣມ 3:9)

ຄົທີ່ບໍ່ຍອມເຊື່ອຟັງຈະໄດ້ຮັບຫຍັງ?

“ຢ່າໃຫ້ຜູ້ໃດລໍ້ລວງພວກທ່ານດ້ວຍຄຳເວົ້າອັນໄຮ້ປໂຍດ ເພາະການເຮັດເຫລົ່ານີ້ແຫລະ, ພຣະພິໂຣດຂອງພຣະເຈົ້າຈຶ່ງຕົກໃສ່ຄົນທັງຫລາຍທີ່ບໍ່ຍອມເຊື່ອຟັງ” (ເອເຟໂຊ 5:6)

ປະສົບການແຫ່ງຄວາມລອດພົ້ນ

ໃຜເປັນຜູ້ບອກຄົນທັງຫລາຍໃຫ້ຮູ້ເຖິງສະພາບຄວາມຜິດບາບ?

“ເມື່ອພຣະອົງ(ຜູ້ປະລົ້ມປະໂລມ)ສະເດັດມາແລ້ວ ພຣະອົງນັ້ນແຫລະ, ຈະຊົງບັນດົນໃຫ້ໂລກຮູ້ແຈ້ງໃນເຣື່ອງຄວາມຜິດບາບ ຄວາມຊອບທັມ ແລະການພິພາກສາ” (ໂຢຮັນ 16:8)

ແລ້ວຄົນທີ່ກັບໃຈໃໝ່ເຂົາຈະມີຄວາມຂ້ອງໃຈຫຍັງ?

“ເມື່ອຄົນທັງຫລາຍໄດ້ຍິນດັ່ງນັ້ນແລ້ວກໍຮູ້ສຶກເຈັບຊ້ຳກິນແຫນງໃຈ ຈຶ່ງກ່າວແກ່ເປໂຕແລະອັຄສາວົກວ່າ, ‘ພີ່ນ້ອງເອີຍ, ພວກເຮົາຈະເຮັດຢ່າງໃດ?’ “ແລະໄດ້ພາທ່ານສອງອອກມາຖາມວ່າ, ‘ທ່ານເອີຍ, ຂ້ານ້ອຍຈະຕ້ອງເຮັດແນວໃດຕໍ່ໄປຈຶ່ງຈະພົ້ນໄດ້’” (ກິດຈະການ 2:37; 16:30)

ແລ້ວເຂົາໄດ້ຮັບຄຳຕອບແນວໃດ?

“ຝ່າຍເປໂຕຈຶ່ງກ່າວແກ່ເຂົາວ່າ, ‘ຈົ່ງຖິ້ມໃຈເກົ່າເອົາໃຈໃຫມ່ ແລະຣັບບັບຕິສະມາໃນພຣະນາມຂອງອົງພຣະເຢຊູຄຣິດທຸກຄົນ ເພື່ອການຊົງຍົກບາບໂທດຂອງພວກທ່ານ ແລ້ວພວກທ່ານຈະໄດ້ຮັບຂອງພຣະຣາຊທານ ຄືພຣະວິນຍານບໍຣິສຸດ’” “ໂປໂລກັບຊີລາຕອບວ່າ, ‘ຈົ່ງເຊື່ອວາງໃຈໃນພຣະເຢຊູເຈົ້າແລ້ວທ່ານຈະໄດ້ພົ້ນ ທັງຄົວເຮືອນຂອງທ່ານດ້ວຍ’” (ກິດຈະການ 2:38; 16:31)

ຜົນຂອງການຖິ້ມໃຈເກົ່າເອົາໃຈໃໝ່ທີ່ແທ້ຈິງ

ແລ້ວຄົນສຳນຶກຜິດທີ່ແທ້ຈິງຈະເຮັດແນວໃດ?

“ຂ້າພຣະອົງສາລະພາບບາບຜິດຂອງຂ້າພຣະອົງ ຂ້າພຣະອົງເປັນທຸກເພາະບາບຂອງຂ້າພຣະອົງ” (ເພງສັນລະເສີນ 38:18)

ໝາຍເຫດ: ນີ້ແມ່ນປະໂຫຍກພາສາອັງກິດ “I will declare mine iniquity; I will be sorry for my sin.”

ແມ່ນຫຍັງແມ່ນຜົນຂອງຄວາມທຸກໃຈຢ່າງຊອບພະໄທຂອງພະເຈົ້າ?

“ດ້ວຍວ່າຄວາມທຸກໃຈຕາມຢ່າງຊອບພຣະທັຍພຣະເຈົ້ານັ້ນ ຍ່ອມເຮັດໃຫ້ກັບໃຈເສັຽໃຫມ່ ຊຶ່ງນຳໄປສູ່ຄວາມພົ້ນ” (2 ໂກຣິນໂທ 7:10)

ແມ່ນຫຍັງແມ່ນຜົນຂອງຄວາມທຸກໃຈຕາມແບບຢ່າງຂອງໂລກ?

“ແຕ່ຄວາມທຸກໃຈຕາມຢ່າງໂລກນັ້ນ ຍ່ອມນຳໄປເຖິງຄວາມຕາຍ” (2 ໂກຣິນໂທ 7:10)

ຄວາມທຸກໃຈຕາມຢ່າງຊອບພະໄທພະເຈົ້າໄດ້ສະແດງອອກໃນຕົວເຮົາແນວໃດແດ່?

“ຈົ່ງພິຈາຣະນາເບິ່ງວ່າ ການທີ່ເຈົ້າທັງຫລາຍໄດ້ທຸກໃຈຕາມຢ່າງຊອບພຣະທັຍພຣະເຈົ້ານັ້ນ ໄດ້ເຮັດໃຫ້ພວກເຈົ້າເກີດມີຄວາມຂຍັນຂັນແຂງຫລາຍເທົ່າໃດ ເອົາໃຈໃສ່ທີ່ຈະແກ້ຕົວຫລາຍເທົ່າໃດ ຄວາມເຄືອງໃຈ ຄວາມຕື່ນຕົວ ຄວາມອາລັຍ ຄວາມຮ້ອນຮົນ ແລະການລົງໂທດຕອບແທນຫລາຍເທົ່າໃດ ໃນທຸກສິ່ງເຫລົ່ານີ້ເຈົ້າທັງຫລາຍໄດ້ສະແດງຕົວວ່າເປັນຄົນບໍ່ມີຜິດໃນການນັ້ນແລ້ວ” (2 ໂກຣິນໂທ 7:11)

ໝາຍເຫດ: ສຳລັບຂໍ້ຄວາມທີ່ຂີດກ້ອງຂ້າງເທິງ ພາສາອັງກິດໃຊ້ຄຳວ່າ “carefulness” ແລະ “clearing of yourselves”

ເມື່ອໂຢຮັນຜູ້ໃຫ້ບັບຕິສະມາເຫັນພວກຟາຣິຊາຍແລະພວກກາດູຊາຍເຂົ້າມາຫາເພື່ອຮັບບັບຕິສະມາ ທ່ານໂຢຮັນໄດ້ກ່າວແກ່ເຂົາແນວໃດ?

“ຄັນໂຢຮັນເຫັນພວກຟາຣິຊາຍແລະພວກຊາດູກາຍ ພາກັນມາຈຳນວນຫລວງຫລາຍເພື່ອຈະຮັບບັບຕິສະມາ ທ່ານຈຶ່ງກ່າວແກ່ເຂົາວ່າ, ‘ອ້າຍຊາດງູຮ້າຍເຮີຍ, ໃຜໄດ້ບອກສູໃຫ້ປົບຫນີຈາກພຣະພິໂຣດທີ່ຈວນຈະມາເຖິງນັ້ນ’” (ມັດທາຍ 3:7)

ແລ້ວໂຢຮັນໄດ້ບອກເຂົາໃຫ້ເຮັດຫຍັງ?

“ເຫດສັນນັ້ນຈົ່ງປະຕິບັດໃຫ້ໄດ້ຜົນສົມກັບການຖິ້ມໃຈເກົ່າເອົາໃຈໃຫມ່” (ມັດທາຍ 3:8)

ໝາຍເຫດ: ຖ້າບໍ່ມີການປ່ຽນແປງກໍບໍ່ມີການຖິ້ມໃຈເກົ້າເອົາໃຈໃໝ່ທີ່ແທ້ຈິງ. ການຖິ້ມໃຈເກົ່າເອົາໃຈໃໝ່ແມ່ນການປ່ຽນແປງທັງຈິດໃຈແລະການກະທຳ.

ເມື່ອພະເຈົ້າສົ່ງໂຢນາໄປເຕືອນຊາວເມືອງນິເນເວ ຊາວເມືອງນັ້ນໄດ້ເຮັດແນວໃດເພື່ອບົ່ງບອກເຖິງການຖິ້ມໃຈເກົ່າເອົາໃຈໃໝ່ຂອງພວກເຂົາ ແລະຜົນທີ່ຕາມມາແມ່ນຫຍັງ?

“ຕໍ່ມາ ພຣະເຈົ້າໄດ້ຊົງເຫັນຊາວນະຄອນນິເນເວເລີກປະພຶດຊົ່ວ ພຣະອົງຈຶ່ງຊົງປ່ຽນພຣະທັຍ ແລະບໍ່ຊົງລົງໂທດເຂົາຕາມທີ່ໄດ້ຊົງສັນຍາໄວ້” (ໂຢນາ 3:10)

ແມ່ນຫຍັງເປັນຕົວນຳຄົນບາບໃຫ້ກັບໃຈໃໝ່?

“ຫລືວ່າເຈົ້າປມາດພຣະກະຣຸນາຄຸນອັນສົມບູນ ແລະຄວາມອົດກັ້ນພຣະທັຍກັບຄວາມອົດທົນຂອງພຣະອົງ ເຈົ້າບໍ່ຮູ້ຫລືວ່າພຣະກະຣຸນາຄຸນຂອງພຣະເຈົ້ານັ້ນ ຊົງປະສົງຈະນຳເຈົ້າໃຫ້ກັບໃຈເສັຽໃຫມ່” (ໂຣມ 2:4)

ການສາລະພາບແລະການໃຫ້ອະໄພ

ພະເຈົ້າໄດ້ໃຫ້ຄຳສັ່ງແນວໃດກ່ຽວກັບຄວາມບາບທີ່ໄດ້ກະທຳ?

“ຈົ່ງກ່າວແກ່ຄົນອິສຣາເອນວ່າ ຜູ້ຊາຍກໍດີ ຫລືຍິງກໍດີກະທຳບາບຢ່າງທີ່ມະນຸດກະທຳ ຄືປະພຶດຝ່າຝືນຕໍ່ພຣະເຈົ້າ ແລະຜູ້ນັ້ນໄດ້ຜິດແລ້ວ ກໍໃຫ້ຜູ້ນັ້ນສາລະພາບຄວາມຜິດທີ່ເຂົາໄດ້ກະທຳ” (ຈົດບັນຊີ 5:6,7)

ມັນເປັນການໄຮ້ປະໂຫຍດປານໃດທີ່ຈະປິດບັງບາບໄວ້?

“ແຕ່ຖ້າທ່ານທັງຫລາຍບໍ່ໄດ້ກະທຳເຊັ່ນນີ້ ທ່ານທັງຫລາຍໄດ້ກະທຳບາບຕໍ່ພຣະຜູ້ເປັນເຈົ້າ ຈົ່ງຮູ້ແນ່ເຖີດວ່າ ບາບຂອງທ່ານກໍຕາມທັນ” (ຈົດບັນຊີ 32:23) “ພຣະອົງຊົງຮູ້ຈັກຄວາມຜິດຂອງຂ້າພຣະອົງ ແລະຊົງເຫັນຄວາມຜິດອັນທີ່ຂ້າພຣະອົງອຳໄວ້” (ເພງສັນລະເສີນ 90:8) “ໃນທຸກສິ່ງທີ່ສ້າງຂຶ້ນນັ້ນ ບໍ່ມີສິ່ງໃດບັງລັບໄວ້ຈາກພຣະພັກຂອງພຣະອົງ ແຕ່ທຸກສິ່ງໄດ້ປາກົດແຈ້ງຕໍ່ພຣະເນດຂອງພຣະອົງ ຜູ້ທີ່ເຮົາຈະຕ້ອງໃຫ້ການນັ້ນ” (ເຮັບເຣີ 4:13)

ພະອົງຊົງສັນຍາວ່າແນວໃດເມື່ອເຮົາສາລະພາບບາບຂອງເຮົາທັງໝົດ?

“ຖ້າເຮົາທັງຫລາຍສາຣະພາບຜິດບາບຂອງພວກເຮົາ ພຣະອົງຊົງສັດຊື່ແລະທ່ຽງທັມ ຈະຊົງໂຜດຍົກບາບຂອງພວກເຮົາ ແລະຈະຊົງໂຜດຊຳຮະລ້າງເຮົາທັງຫລາຍຈາກການອະທັມຫມົດສິ້ນ” (1 ໂຢຮັນ 1:9)

ຜົນຂອງການປິດບັງບາບໄວ້ແລະຜົນຂອງການສາລະພາບບາບອອກມາແຕກຕ່າງກັນແນວໃ?

“ຖ້າເຈົ້າພຍາຍາມປິດບັງບາບໄວ້ ຊີວິດຂອງເຈົ້າກໍຈະບໍ່ຈະເຣີນ ຈົ່ງສາລະພາບແລະປ່ຽນໃຈເສັຽ ແລ້ວພຣະເຈົ້າຈະຊົງສຳແດງພຣະກະຣຸນາຕໍ່ເຈົ້າ” (ສຸພາສິດ 28:13)

ສາລະພາບບາບທຸກຢ່າງ

ບາບກຳໃດແດ່ທີ່ຄວນສາລະພາບອອກມາ?

“ເມື່ອຜູ້ນຶ່ງຜູ້ໃດກະທຳບາບກັມໃດໆທີ່ກ່າວມານີ້ ກໍໃຫ້ເຂົາສາລະພາບຄວາມຜິດທີ່ເຂົາໄດ້ກະທຳ” ( ລະບຽບພວກເລວີ 5:5)

ພວກອິສຣາເອນເຄີຍສາລະພາບອອກມາຫລາຍປານໃດກ່ຽວກັບການກະທຳຜິດຂອງພວກເຂົາ?

“ພວກເຂົາໄດ້ເວົ້າຕໍ່ຊາມູເອນວ່າ, ‘ທ່ານເອີຍ ຂໍໄດ້ໂຜດກະຣຸນາອ້ອນວອນພຣະຜູ້ເປັນເຈົ້າຂອງທ່ານສຳລັບພວກຂ້າພະເຈົ້າແດ່ ເພື່ອວ່າພວກຂ້າພະເຈົ້າຈະບໍ່ຕາຍ ນອກຈາກຄວາມຜິດຢ່າງອື່ນຂອງພວກຂ້າພະເຈົ້າແລ້ວ ພວກຂ້າພະເຈົ້າກໍໄດ້ເຮັດຜິດໂດຍການຮ້ອງຂໍເອົາເຈົ້າຊີວິດ’” (1 ຊາມູເອນ 12:19)

ເມື່ອກະສັດດາວິດສາລະພາບບາບຂອງພະອົງ ພະອົງໄດ້ກ່າວວ່າພະເຈົ້າໄດ້ກະທຳຫຍັງ?

“ແຕ່ເມື່ອຂ້າພຣະອົງຍອມຮັບຜິດຕໍ່ພຣະອົງ ໂດຍບໍ່ໄດ້ປົກປິດຫຍັງໄວ້ ຂ້າພຣະອົງສາລະພາບທຸກຢ່າງ ແລ້ວພຣະອົງກໍຊົງອະພັຍໃນການລ່ວງລະເມິດຂອງຂ້າພຣະອົງ” (ເພງສັນລະເສີນ 32:5)

ພະເຈົ້າຍິນດີໃນການໃຫ້ອະໄພ

ພະອົງພ້ອມທີ່ຈະເຮັດຫຍັງ ເມື່ອທຸກຄົນສະແຫວງຫາການໃຫ້ອະໄພ?

“ຂ້າແດ່ອົງພຣະຜູ້ເປັນເຈົ້າ ເພາະພຣະອົງປະເສີດແລະຊົງພ້ອມທີ່ຈະປະທານອະພັຍ ອຸດົມດ້ວຍຄວາມຮັກຫມັ້ນຄົງຕໍ່ບັນດາຜູ້ຮ້ອງທູນພຣະອົງ” (ເພງສັນລະເສີນ 86:5)

ກະສັດດາວິດໄດ້ຝາກຄວາມຫວັງແຫ່ງການໄດ້ຮັບການໃຫ້ອະໄພໄວ້ກັບຫຍັງ?

“ໂອ້ ພຣະອົງເຈົ້າຂ້າ ຍ້ອນຄວາມຮັກຫມັ້ນຄົງຂອງພຣະອົງ ຂໍຊົງໂຜດເມດຕາຂ້າພຣະອົງເທີ້ນ ຍ້ອນຄວາມເມດຕາອັນຍິ່ງໃຫຍ່ຂອງພຣະອົງ ຂໍຊົງປັດເປົ່າຄວາມຜິດຂອງຂ້າພຣະອົງອອກໄປດ້ວຍ” (ເພງສັນລະເສີນ 51:1)

ອັນໃດເປັນຕົວວັດແທກຄວາມຍິ່ງໃຫຍ່ແຫ່ງພະກະລຸນາຂອງພະເຈົ້າ?

“ຟ້າສວັນສູງເຫນືອແຜ່ນດິນໂລກຫລາຍເທົ່າໃດ ຄວາມຮັກທີ່ພຣະອົງຊົງມີແກ່ຜູ້ທີ່ຢຳເກງພຣະອົງກໍສູງຫລາຍເທົ່ານັ້ນ” (ເພງສັນລະເສີນ 103:11)

ພະເຈົ້າຊົງໃຫ້ອະໄພຫລາຍປານໃດແກ່ຜູ້ທີ່ກັບໃຈໃໝ່?

“ຊົງໃຫ້ຄົນອະທັມຫນີຈາກທາງດຳເນີນຊີວິດຂອງເຂົາ ແລະຊົງປ່ຽນແນວທາງຄິດຂອງເຂົາ ຊົງໃຫ້ເຂົາກັບຄືນມາຫາພຣະຜູ້ເປັນເຈົ້າຂອງເຮົາ ພຣະອົງຊົງເຕັມໄປດ້ວຍຄວາມເມດຕາແລະຊົໃຫ້ອະພັຍໄວ” (ເອຊາຢາ 55:7)

ໝາຍເຫດ: ສຳລັບຂໍ້ຄວາມທີ່ຂີດກ້ອງໄວ້ຂ້າງເທິງ ພາສາອັງກິດເຂົາໄດ້ແປອອກມາວ່າ “ພະອົງຈະຊົງໃຫ້ອະໄພຢ່າງເຫລືອລົ້ນ” “He will abundantly pardon.”

ແມ່ນຫຍັງແມ່ນເຫດຜົນຂອງການພ້ອມທີ່ຈະໃຫ້ອະໄພຂອງພະເຈົ້າ

“ໂອ ພຣະຜູ້ເປັນເຈົ້າເອີຍ, ບໍ່ມີພຣະເຈົ້າອົງໃດເຫມືອນພຣະອົງເລີຍ ພຣະອົງຊົງຍົກໂທດຄວາມບາບຂອງໄພ່ພົນຜູ້ທີ່ຍັງເຫລືອຢູ່ ພຣະອົງຈະບໍ່ພິໂຣດອີກຕໍ່ໄປ ແຕ່ຍິນດີຈະສະແດງຄວາມຮັກຫມັ້ນຄົງຕໍ່ພວກຂ້າພຣະອົງ” (ມີກາ 7:18) (ເບິ່ງເພີ່ມເຕີມໃນ ເພງສັນລະເສີນ 78:38)

ເປັນຫຍັງພະອົງຄືອົດກັ້ນພະໄທໄວ້ດົນນານຕໍ່ຄົນທີ່ສືບຕໍ່ເຮັດບາບ?

“ອົງພຣະຜູ້ເປັນເຈົ້າບໍ່ໄດ້ຊົງເສີຍຊ້າໃນເຣື່ອງພຣະສັນຍາຂອງພຣະອົງ ເຫມືອນດັ່ງບາງຄົນ ຄຶດວ່າຊ້າ ແຕ່ພຣະອົງຊົງອົດກັ້ນພຣະທັຍໄວ້ດົນນານເພາະເຫັນແກ່ທ່ານທັງຫລາຍ ພຣະອົງບໍ່ຊົງປະສົງທີ່ຈະໃຫ້ຜູ້ນຶ່ງຜູ້ໃດຈິບຫາຍເສັຽ ແຕ່ຊົງປາຖນາທີ່ຈະໃຫ້ຄົນທັງປວງມາເຖິງການຖິ້ມໃຈເກົ່າເອົາໃຈໃຫມ່” ( 2 ເປໂຕ 3:9)

ເລື່ອງຕົວຢ່າງ

ໃນຄຳອຸປະມາເລື່ອງບຸດລົງຫາຍ ເມື່ອລູກຊາຍນ້ອຍກັບໃຈແລະຕ່າວກັບຄືນເຮືອນ ພໍ່ຂອງລາວໄດ້ເຮັດແນວໃດຕໍ່ລາວ?

“ແລ້ວເຂົາກໍລຸກຂຶ້ນຄືນເມືອຫາພໍ່ຂອງຕົນ ແຕ່ເມື່ອເຂົາຍັງຢູ່ໄກ ພໍໄດ້ແລເຫັນເຂົາກໍມີຄວາມເມດຕາ ຈຶ່ງແລ່ນອອກໄປກອດຄໍຈູບເຂົາດ້ວຍຄວາມຮັກແພງ” (ລູກາ 15:20)

ຜູ້ເປັນພໍ່ໄດ້ເຮັດຫຍັງເພື່ອສະແດງອອກເຖິງຄວາມຍິນດີທີ່ລູກຊາຍກັບຄືນເຮືອນ?

“ແຕ່ພໍ່ໄດ້ເອີ້ນບອກພວກຂ້ອຍໃຊ້ຂອງຕົນວ່າ, ‘ຈົ່ງຮີບເອົາເຄື່ອງນຸ່ງຢ່າງດີທີ່ສຸດອອກມານຸ່ງໃຫ້ລູກຂອງເຮົາ ແລະເອົາແຫວນມາສວມໃສ່ມືກັບເອົາເກີບມາສຸບໃສ່ຕີນ ແລ້ວຈົ່ງເອົາງົວຫນຸ່ມໂຕອ້ວນພີມາຂ້າລ້ຽງກັນເພື່ອຊື່ນຊົມຍິນດີ ເພາະລູກຂອງເຮົາຄົນນີ້ຕາຍແລ້ວກໍໄດ້ຄືນມາ ເສັຽໄປແລ້ວກໍໄດ້ພົບກັນອີກ’ ແລະເຂົາທັງຫລາຍກໍຕັ້ງຕົ້ນມີຄວາມຊົມຊື່ນຍິນດີ” (ລູກາ 15:22-24)

ຈະມີຄວາມຮູ້ສຶກແນວໃດໃນສະຫວັນເມື່ອຄົນບາບກັບໃຈ?

“ດັ່ງນັ້ນແຫລະ, ເຮົາບອກທ່ານທັງຫລາຍວ່າ ຈະມີຄວາມປິຕິຍີນດີໃນຖ້າມກາງພວກເທວະດາຂອງພຣະເຈົ້າ ເພາະເຫັນແກ່ຄົນນອກສິນທັມຄົນດຽວ ທີ່ຖິ້ມໃຈເກົ່າເອົາໃຈໃຫມ່” (ລູກາ 15:10)

ເຮເຊກີຢາໄດ້ກ່າວວ່າພະເຈົ້າໄດ້ກະທຳຫຍັງແກ່ລາວ?

“ເພາະເຫັນແກ່ສະວັດດີພາບຂອງຂ້າພຣະອົງ ຂ້າພຣະອົງຈຶ່ງມີຄວາມຂົມຂື່ນມາກຍິ່ງ ແຕ່ພຣະອົງຊົງຮັກຊີວິດຂອງຂ້າພຣະອົງ ບໍ່ໃຫ້ຕົກຫລຸມແຫ່ງຄວາມພິນາດ ເພາະການບາບຂອງຂ້າພຣະອົງກໍໄດ້ຮັບອະພັຍ” (ເອຊາຢາ 38:17)

ພະເຈົ້າຢາກແຍກບາບອອກຈາກເຮົາໃຫ້ບາບນັ້ນໄກຫ່າງຫລາຍປານໃດ?

“ພຣະອົງຍັງຈະເມດຕາຕໍ່ພວກຂ້າພຣະອົງອີກເທື່ອນຶ່ງຄື ພຣະອົງຈະຢຽບຄວາມຜິດຂອງພວກຂ້າພຣະອົງໄວ້ໃຕ້ພຣະບາດ ແລະໂຍນຄວາມບາບຂອງພວກຂ້າພຣະອົງລົງໃນທະເລເລິກ” (ມີກາ 7:19) “ທິດຕາເວັນອອກໄກຈາກທິດຕາເວັນຕົກຫລາຍເທົ່າໃດ ພຣະອົງກໍຊົງຍົກຄວາມບາບຂອງພວກເຮົາອອກໄປໄກຫລາຍເທົ່ານັ້ນ” (ເພງສັນລະເສີນ 103:12)

ຄົນໃນເມືອງເອເຟໂຊເຮັດຫຍັງເພື່ອສະແດງໃຫ້ຮູ້ວ່າ ພວກເຂົາໄດ້ກັບໃຈຢ່າງແທ້ຈິງ?

“ມີຫລາຍຄົນທີ່ເຊື່ອແລ້ວໄດ້ມາສາຣະພາບແລະເປີດເຜີຍການທີ່ເຂົາເຄີຍເຮັດ ມີຫລາຍຄົນທີ່ໃຊ້ເວດມົນຄາຖາໄດ້ເອົາຕຳຣາຂອງຕົນມາເຜົາໄຟເສັຽຕໍ່ຫນ້າຄົນທັງປວງ ຕຳຣາເຫລົ່ານັ້ນຄິດຣາຄາເປັນເງິນຫ້າຫມື່ນຫລຽນ” (ກິດຈະການ 19:18-19)

ເງື່ອນໄຂຂອງການໃຫ້ອະໄພ

ພະຄຣິດໄດ້ບອກໃຫ້ເຮົາຂໍການໃຫ້ອະໄພເທິງພື້ນຖານອັນໃດ?

“ຂໍຊົງໂຜດຍົກໂທດໃຫ້ຂ້າພຣະອົງ ເຫມືອນຂ້າພຣະອົງຍົກໂທດໃຫ້ແກ່ຜູ້ທີ່ເຮັດຜິດຕໍ່ຂ້າພຣະອົງນັ້ນ” (ມັດທາຍ 6:12)

ເຮົາຄວນມີຈິດໃຈຂອງການໃຫ້ອະໄພແນວໃດ ຖ້າເຮົາຢາກຮັບການໃຫ້ອະໄພຈາກພະເຈົ້າ?

“ເພາະວ່າຖ້າວ່າທ່ານຍົກຄວາມຜິດຂອງເພື່ອນມະນຸດ ພຣະບິດາຂອງທ່ານຜູ້ຊົງສະຖິດໃນສວັນຈະຊົງໂຜດຍົກຄວາມຜິດຂອງທ່ານດ້ວຍ ແຕ່ຖ້າທ່ານບໍ່ຍົກຄວາມຜິດຂອງເພື່ອນມະນຸດ ພຣະບິດາຂອງທ່ານກໍຈະບໍ່ຊົງໂຜດຍົກຄວາມຜິດຂອງທ່ານເຫມືອນກັນ” (ມັດທາຍ 6:14-15)

ຄວາມຈິງທີ່ພະເຈົ້າຊົງໃຫ້ອະໄພເຮົານັ້ນແມ່ນຢືນຢູ່ເທິງພື້ນຖານອັນໃດ?

“ຈົ່ງມີໃຈເມດຕາຕໍ່ກັນ ມີໃຈເອັນດູກັນ ແລະອະພັຍໂທດໃຫ້ກັນ ເຫມືອນດັ່ງພຣະເຈົ້າໄດ້ຊົງໂຜດອະພັຍໂທດໃຫ້ແກ່ພວກທ່ານໃນອົງພຣະຄຣິດນັ້ນ” (ເອເຟໂຊ 4:32)

ຄວາມສຸກຂອງຜູ້ໃຫ້ແລະຜູ້ຮັບ

ການໃຫ້ກັບໃຈໃໝ່ແລະການໃຫ້ອະໄພຖືກປະທານໃຫ້ຜ່ານໃຜ?

“ພຣະເຢຊູຊຶ່ງທ່ານທັງຫລາຍໄດ້ຂ້າເສັຽໂດຍແຂວນໄວ້ທີ່ຕົ້ນໄມ້ນັ້ນ ພຣະເຈົ້າແຫ່ງບັນພະບຸຣຸດຂອງເຮົາໄດ້ຊົງບັນດານໃຫ້ເປັນຄືນມາໃຫມ່ ພຣະອົງນັ້ນແຫລະ, ພຣະເຈົ້າໄດ້ຊົງຍົກຕັ້ງໄວ້ທີ່ພຣະຫັດກ້ຳຂວາຂອງພຣະອົງ ໃຫ້ເປັນອົງພຣະຜູ້ນຳແລະອົງພຣະຜູ້ໂຜດໃຫ້ພົ້ນ ເພື່ອຈະໃຫ້ຊົນອິສຣາເອນກັບໃຈໃຫມ່ ແລ້ວຈະຊົງໂຜດຍົກຄວາມຜິດບາບຂອງເຂົາ” (ກິດຈະການ 5:30-31)

ຜູ້ທີ່ໄດ້ຮັບການໃຫ້ອະໄພຈະມີສະພາບແບບໃດ?

“ຄວາມສຸກເປັນຂອງຜູ້ທີ່ໄດ້ຮັບການໃຫ້ອະພັຍ ແລະຜູ້ທີ່ໄດ້ຮັບການຍົກໂທດ ຄວາມສຸກເປັນຂອງຜູ້ທີ່ພຣະຜູ້ເປັນເຈົ້າບໍ່ໄດ້ຕໍ່ວ່າການກະທຳຜິດຂອງເຂົາ ແລະຜູ້ບໍ່ມີກົນອຸບາຍຫລອກລວງຄົນອື່ນ” (ເພງສັນລະເສີນ 32:1-2)